Kai Sotto babatakin sa training
Puntirya ni coach Yeng Guiao na batakin si Kai Sotto kaya’t kinausap na niya ang batang 7-1 player para masama bilang “developmental player” sa Gilas pool na bubuuin para sa susunod na FIBA World Cup qualifying window.
Ibig sabihin makakasama ni Sotto sa training sina Greg Slaughter, June Mar Fajardo, Christian Standhardinger, Ian Sangalang, Raymond Almazan, Poy Erram at iba pang bigating PBA frontline players.
May mga taong agad nagparamdam ng pangamba.
“He’ll be manhandled by the heftier tall frontlines of Iran and maybe even Qatar. Kai would be like a young girl exploited in front of many spectators. He’s not ready for this. Maybe they should bring him as a practice player for our senior national team for some time before letting him to play,” ani ng isa kong Twitter follower.
Masyado nga lamang mabilis ang pag-iisip ng follower kong ito dahil nasa isip na niya agad na isasalang na sa laban ang 16-year-old na player.
Ang layunin lang ni coach Yeng ay tulungan mapabilis ang development ni Kai sa training, at hindi naman isasalang agad kalaban si Hamed Haddadi, Yi Jianlian, Ricardo Ratliffe at iba pang higante sa Asia.
Wala na siyang matutunan kung ang mga teammates lang niya sa Ateneo juniors ang kasama sa training.
Pinagdaanan din nila Jun Limpot, Marlou Aquino at marami pang iba ang parehong proseso. Sila’y agad napasama sa senior national pool upang agad mabatak sa laro dahil nga angat na angat na sila sa kanilang mga kaedad.
Pero maganda rin naman ang isipan ng Twitter follower kong si Kristoffer Manaloto sa kanyang pangambang agad masama sa senior national team si Kai.
“We all know he is a national treasure and we don’t want him to suit up and bang bodies with Asia’s best prematurely,” aniya.
Muling magsasama-sama ang national pool simula sa unang linggo ng Nobyembre upang paghandaan ang back-to-back home games kontra sa Kazakhstan at Iran sa MOA Arena.
At muli ng bukas para sa Filipino fans ang laro ng Team Phl dahil nai-serve na ng national federation ang one-game sanction ng FIBA.
- Latest
