Phoenix inubos ang Magnolia
MANILA, Philippines — Patuloy ang mainit na simula ng Phoenix nang ipalasap ang unang kabiguan ng Magnolia, 95-82, para sa kanilang ikatlong sunod na tagumpay sa 2018 PBA Governors’ Cup kahapon sa Smart Araneta Coliseum.
Ngunit hindi ito naging madali dahil naglustay muna ng 13 puntos na kalamangan sa first half ang Fuel Masters bago bumawi sa fourth quarter kung saan tuluyan na nilang binaon ang Hotshots sakay ng 16-8 birada para makapagtayo ng 87-75 abante.
Hindi na bumitaw pa sa manibela ang Phoenix buhat noon tungo sa malaking tagumpay laban sa Magnolia.
“For me, one of the best ang Magnolia especially sa defense,” sabi ni head coach Louie Alas. “We were able to put a clamp on their offensive guys especially in the third quarter.”
Bunsod nito, solo na ngayon sa ikalawang puwesto ang Fuel Masters tangan ang 5-1 kartada sa likod ng wala pang galos na Blackwater Elite (4-0) papalapit sa gitnang bahagi ng season-ending conference.
Giniyahan ni super import Eugene Phelps ang atake ng Phoenix mula sa kanyang 36 points, 20 rebounds at 4 blocks, habang may tig-13 markers sina Matthew Wright at Justin Chua.
Malaki rin ang ambag ng bagong Phoenix player na si Calvin Abueva na tumapos na may 9 points at 10 rebounds sahog pa ang 3 blocks.
Sa kabilang banda, hindi naman sumapat ang hinakot na 28 points at 19 rebounds ni reinforcement Romeo Travis gayundin ang tig-11 puntos nina Ian Sangalang, Jio Jalalon at Mark Barroca para sa Hotshots na nalasap ang unang pagkatalo sa tatlong salang.
Samantala, ibinigay ni Philippine Olympic Committee (POC) president Ricky Vargas ang cash incentives ng mga atletang nag-uwi ng medalya sa nakaraang 18th Asian Games sa Indonesia.
PHOENIX 95 - Phelps 36, Wright 13, Chua 12, Abueva 9, Revilla 9, Jazul 9, Perkins 7, Intal 0, Wilson 0.
Magnolia 82 - Travis 28, Barroca 11, Sangalang 11, Jalalon 11, Lee 8, Ramos 6, Dela Rosa 3, Melton 2, Gamalinda 2, Pascual 0, Reavis 0, Brondial 0, Herndon 0.
Quarterscores: 30-19; 48-48; 71-67; 95-82.
- Latest
