Azkals umakyat sa No. 114

MANILA, Philippines – Mananatili pa rin ang Philippine Azkals bilang ikalawang pinakamahusay sa Southeast Asian football nation.

Ito ay matapos ilabas ang FIFA World Football Rankings para sa buwan ng Setyembre kung saan umakyat sa No. 114 ang Pilipinas makaraang mahulog sa No. 115 noong Hunyo at Agosto.

Ang Vietnam ang pinakamagaling na football team sa Southeast Asia sa kanilang ranggong No. 102.

Nauna nang umakyat sa all-time best na 111th world ranking ang Pilipinas noong buwan ng Mayo.

Umiskor ang Azkals ng 1-1 draw laban sa Bahrain sa kanilang international friendly match noong Setyembre 6 sa Riffa, Bahrain na nagtampok sa bagong coach na si Scott Cooper, pumalit sa umatras na si Terry Butcher.

Nakalasap naman ang koponan ng 2-3 kabiguan laban sa tropa ng Al-Hadd matapos ang tatlong araw.

Naghahanda ang Azkals sa kanilang paglahok sa dalawang major tournaments na AFF Suzuki Cup sa Nobyembre at sa AFC Asian Cup sa Enero ng 2019.

Kung magiging maganda ang ipapakita ng Azkals sa nasabing dalawang torneo ay inaasahang tataas ang kanilang estado sa FIFA World Rankings.