Go For Gold asam ang titulo
MANILA, Philippines — Masikwat ang asam na titulo ang hangarin ng Go For Gold sa Game Four ng umaatikabong 2018 PBA Developmental League Foundation Cup Finals kontra sa nanganganib na Che’Lu Bar and Grill sa Ynares Sports Arena sa Pasig City.
Nakatakda ang nasabing banggaan ngayong alas-5 ng hapon kung saan tatangkain ng Scratchers na tapusin ang kanilang best-of-five championship series at huwag nang pahiritin pa ng winner-take-all Game Five ang karibal na Revellers.
Tangan ang 2-1 abante, may tsansa ang Go For Gold na mapitas ang prestihiyosong Foundation Cup title na siyang magiging unang kampeonato ng koponan sa kasaysayan.
Tiwala si head coach Charles Tiu na kaya ng kanyang mga bataan na wakasan na ang serye:
“Our players know what’s at stake so not to pressure them or anything, but we just have to play and win today,” sabi ni Tiu.
Sasandal si Tiu sa naging bayani ng kanilang 98-96 panalo sa Game Three na si guard Paul Desiderio para trangkuhang muli ang atake ng Scratchers.
Magugunitang si Desiderio ang nagpanalo sa Go For Gold sa Game Three sa likod ng kanyang game-winning layup at steal sa huling segundo tungo sa game-high na 28 points at 5 rebounds.
Inaasahan namang aalalay sa kanya ang MVP candidate na si Gab Banal matapos ang kumpletong 11 points, 8 rebounds at 6 assists na ambag nito sa Game Three.
Sa kabilang banda, hindi naman isusuko ng Che’Lu nang ganoon na lang ang sarili nitong misyon na mabingwit ang titulo lalo’t gutom itong makaganti sa Go For Gold upang makapuwersa ng sudden-death Game Five.
“Our mindset will be no retreat, no surrender, ani Che’Lu coach Stevenson Tiu. “We’ll do our best to force Game Five.”
Sa likod ng isa ring MVP candidate na si Jeff Viernes ay susubok ang Revellers na makapuwersa ng Game Five upang makaiwas sa isa na namang runner-up finish matapos kapusin sa Zark’s Burger-Lyceum sa Aspirants’ Cup Finals.
Malalaman din ngayon kung sino ang magiging MVP sa hanay nina Viernes at Banal.
- Latest
