Adamson inagaw ang solong liderato

MANILA, Philippines — Dinungisan ng Adamson University ang rekord ng University of Santo Tomas sa pamamagitan ng 15-25, 26-24, 25-23, 25-20 desisyon para masi­guro ang top seeding sa semifinals ng Premier Vol­ley­ball League Season 2 Collegiate Conference ka­hapon sa The Arena sa San Juan City.

Nanatiling malinis ang rekord ng Lady Falcons na sumulong sa 5-0 marka para masolo ang li­derato, habang nahulog sa No. 2 ang Tigresses na lu­masap ng unang kabiguan sa anim na laro.

Balanseng atake ang inilabas ng Adamson kung saan apat na players nito ang nagtala ng double-digits kabilang na si team captain Lea Perez na gu­mawa ng 12 markers kasama ang apat na solidong blocks at tatlong aces.

Pare-parehong may 10 points sina oppo­site hitter Eli Soyud, outside spiker Bernadeth Flo­ra at substitute Trisha Genesis para sa Lady Fal­cons.

Umuusok ang Tigresses sa attack line nang magrehistro ng 53-35 bentahe sa spikes.

Subalit mas matindi ang depensa ng Adamson sa net bitbit ang 12-5 edge sa blocks.

Nakakuha pa ang Lady Falcons ng 38 libreng puntos mula sa errors ng Tigresses.

Nasayang ang 23 puntos na pinaghirapan ni Fi­lipino-Italian Alessandrini Milena para sa UST.

Sa ikalawang laro, namayani ang Far Eastern Uni­­versity kontra sa University of the Philippines, 15-25, 25-23, 15-25, 25-23, 15-7.

Sa men’s division, nilapa ng reigning UAAP champion na National University ang Adamson, 25-21, 23-25, 25-10, 21-25, 17-15, para makabalik sa porma hawak ang 6-1 baraha.

Hindi alintana ng Bulldogs ang hindi paglalaro ni Bryan Bagunas dahil pumutok nang husto si An­ge­lo Almendras sa 30 puntos, habang sumuporta si Madz Gampong na nagdagdag ng 18 hits.

Namayani rin ang Far Eastern University sa San Beda University, 25-18, 25-18, 23-25, 25-18, pa­ra mapaganda ang rekord nito sa 4-3.

Nakalikom si middle blocker John Paul Bu­gaoan ng 20 hits, samantalang may 13 si Redjohn Pa­ler at tig-10 sina Peter Quielnat Mark Calado pa­ra sa Tamaraws.

Laglag ang Soaring Falcons sa 4-3 bataha, samantalang na­­hulog naman ang Red Lions sa 2-4 kartada.