Win No. 6 asam ng San Beda
MANILA, Philippines — Target ng nagdedepensang San Beda Red Lions ang pang-anim sunod na panalo sa pagharap sa San Sebastian Stags habang asam naman ng Perpetual Help Altas ang ikatlong sunod na panalo sa pagsagupa sa Mapua ngayon sa pagpapatuloy ng 94th NCAA basketball tournament sa FilOil Flying V Center sa San Juan City.
Haharapin ng Red Lions ang dumadausdos na Stags sa alas-4 ng hapon pagkatapos ng laro ng Altas at Mapua Cardinals sa alas-2 ng hapon.
Sa juniors’ division, hangad din ng Mapua Red Robins ang ika-anim na panalo sa pakikipagtuos sa Perpetual Help Junior Altas sa alas-10 ng umaga na susundan ng laro ng SBU Red Cubs at San Sebastian Staglets sa alas-12 ng tanghali.
Inaasahang muling hahataw sina Robert Bolick, AC Soberano at Donald Tankuoa para sa Red Lions ni coach Boyet Fernandez.
Ang deadly trio ng Mendiola-based Red Lions ay nagtulung-tulong para maka-eskapo ng 80-76 panalo via overtime laban sa Letran Knights noong Biyernes upang makamit ang ika-limang panalo at mapanatili ang malinis na kartada.
Sa larong iyon, umani si Bolick ng 20 puntos, 11 rebounds at anim na assists, habang si Soberano ay komunekta ng dalawang triples para manatili sa ikalawang puwesto sa likuran ng nangungunang Lyceum (7-0).
“I’m inspired by Scottie Thompson. If he can rebound, why can’t I,” sabi ni Bolick.
Sa kabilang panig naman, gusto rin ng Stags ni coach Egay Macaraya na bumangon agad mula sa masaklap na pagkatalo sa mga kamay ng Altas, 76-78 noong Agosto 9.
Kaya tiyak ang magandang laban sa pagitan ng Red Lions at Stags na sa ngayon ay nasa pang-pitong puwesto sa 3-5 baraha.
- Latest