Painters nakalusot sa Bolts sa OT para sa ‘twice-to-beat’ bonus

MANILA, Philippines — Hindi basta-basta na­ku­ha ng Elasto Painters ang No. 1 berth sa eight-team quarterfinal round ng 2018 PBA Commissioner’s Cup.

Dumaan muna sa overtime ang Elasto Pain­ters bago mapatumba ang Me­ralco Bolts, 106-99, at kunin ang isa sa da­la­wang ‘twice-to-beat’ in­centive sa quarterfinals ka­hapon sa Smart Arane­ta Coliseum.

Humugot si import Reg­gie Johnson ng lima sa kanyang 21 points sa extra period para sa ika­anim na sunod na arangkada ng Rain or Shine.

Nalasap naman ng Me­ralco ang ikalawang di­kit na kamalasan.

Ang No. 1 at No. 2 teams ang hahawak ng ‘twice-to-beat’ advantage sa quarterfinals laban sa No. 8 at No. 7, ayon sa pag­kakasunod at mag­tu­­tuos naman sa best-of-three series ang No. 3 la­ban sa No. 6 at ang No. 4 kontra sa No. 5.

Huling nakadikit ang Bolts sa 99-102 sa 1:13 mi­nuto ng extra period ka­sunod ang split ni Chris Tiu at three-pointer ni Ed Daquioag para ilayo ang Elasto Painters sa 106-99 sa huling 12.7 segundo.

Nagdagdag si Johnson ng 18 rebounds at 3 blocks, habang nagtala si point guard Maverick Ahan­misi ng 20 markers, 8 boards at 6 assists para sa Rain or Shine, naglista ng 18-point lead, 73-55, sa 8:32 minuto ng third pe­riod bago nakatabla ang Meralco sa 96-96 sa 2:25 minuto ng fourth quarter patungo sa overtime.

Pansa­man­talang titigil ang aksyon sa PBA para bigyang-daan ang pag­la­laro ng Gilas Pilipinas sa 2019 FIBA World Cup Asian Qualifiers laban sa Chinese-Taipei sa Hun­yo 29 sa Taiwan at kontra sa Australia sa Hul­yo 2 sa Philippine Arena sa Bocaue, Bulacan.