MANILA, Philippines – Mabilis na pinasuko ng Petro Gazz ang Iriga-Navy, 25-22, 30-28, 25-13, para hablutin ang kanilang ikalawang sunod na panalo sa Premier Volleyball League Reinforced Conference kahapon sa The Arena sa San Juan City.
Impresibo ang debut ng bagong Petro Gazz import na si Olina Lymareva-Flink na bumanat ng 16 puntos mula sa 12 attacks at apat na aces kasama ang 14 digs.
“I only have two practices with this team before this game but I think we already found a connection and I hope to play better and better in our next games,” ani Lymareva-Flink na pumalit kay Kadi Kullerkann na nagtamo ng injury.
Nagdagdag si middle blocker Cherry Nunag ng siyam na puntos at may walo si Anastasia Trach, lima si Ranya Musa at apat naman si team captain Stephanie Mercado para sa Gazz Angels.
Umani ng solidong 31 puntos ang Lady Oragons galing kina imports Macy Ubben at Lauren Whyte na nabigong makakuha ng suporta.
Sa men’s division, nagwagi naman ang PLDT Home Fibr Power Hitters laban sa Philippine Army Troopers, 25-15, 25-10, 25-23, para umangat sa 2-2 baraha.
Nagsumite sina Mark Alfafara at Johnvic De Guzman ng tig-11 puntos para sa Power Hitters na may 41-24 bentahe sa attacks.
Bumagsak sa 1-3 ang Troopers.