Naawat ng Houston ang Portland

PORTLAND -- Nagwakas na ang winning streak ng Trail Blazers sa 13-games.

Humataw si Most Valuable Player candidate James Harden ng 42 points para tulungan ang league-leading Houston Rockets sa 115-111 paggupo sa Portland.

Ito ang ika-13 panalo ng Houston sa huli nilang 14 laro matapos ang All-Star break.

“They’ve been playing well, we all know that,” sabi ni Harden. “Nothing changes for us, no matter who we play. We go out there and just do our thing on both ends of the floor. Tonight was no different.”

Ang step-back three-pointer ni Harden ang naglayo sa Rockets sa 113-104 bentahe sa huling 1:55 minuto ng fourth period bago ito ibinaba ng Trail Blazers sa dalawang puntos sa natitirang minuto.

Binanderahan ni forward Al-Farouq Aminu ang Portland sa kanyang 22 points, isa sa limang Trail Blazers players na umiskor sa double figure.

Nagdagdag si Jusuf Nurkic ng 21 points kasunod ang 20 markers ni Damian Lillard para sa Portland, nanatiling nasa ibabaw ng Oklahoma City Thunder para sa third place sa Western Conference.

Sa Orlando, binura ng Eastern Conference leading Toronto Raptors ang eight-point fourth-quarter deficit para resbakan ang Magic, 93-86.

Hindi naglaro si star DeMar DeRozan dahil sa left thigh contusion para sa Raptors, nakahugot kay Kyle Lowry ng game-high na 25 points, 5 rebounds at 8 assists.

Sa Boston, pinadapa ng Celtics ang Oklahoma City Thunder, 100-99 kung saan nagsalpak si Marcus Morris ng triple sa natitirang 1.2 segundo ng laro.

“They came in here with their full squad and they thought it was going to be a cakewalk,” wika ni Morris.

Wala sa aksyon si Celtics star Kyrie Irving dahil sa namamagang tuhod ngunit nagtala ang pumalit sa kanyang si Jayson Tatum ng 23 points at 11 rebounds.

Nagdagdag si Morris ng 21 points para sa Boston, tinapos ang six-game winning streak ng Oklahoma City.

Nagtala si Russell Westbrook ng 27 points, 8 rebounds at 7 assists para sa Thunder.