4 gold medals pinitas ng mga junior wushu artists
MANILA, Philippines – Humakot ang Pilipinas ng apat na gold medals sa 8th Asian Junior Wushu Championships sa Xilinhot, Inner Mongolia, China.
Naidepensa ni Ken Alieson Omengan ng Baguio City ang kanyang nanquan (Southern fist) title at namayani sa nandao (curved, one sided sword) na kanyang dinomina noong 2012 para sikwatin ang dalawang gintong medalya.
Dinuplika ni Omengan ang naturang bilang ng gold medals sa nakaraang junior continentals.
Muli ring nagdomina si Agatha Chrystenzen Wong sa taijijian 42 forms para sa kanyang back-to-back gold performance sa nasabing event na gumagamit ng double-edged sword na sinabayan ng taijiquan movements.
Inangkin ng baguhang si Spencer Bahod ang gintong medalya sa taijijian 42 forms sa premier wushu competition sa Asya para sa mga atletang may edad na 18-anyos pababa.
Nagdagdag naman si Aleca Breana Dumseng ng bronze medal sa qiangshu (flexible spear).
Magtatapos ang Asian juniors ngayong araw at hangad ng mga Filipino wushu artists na madagdagan ang kanilang mga nakamit na gintong medalya.
- Latest
