CEBU, Philippines – Usa ka polis ang gidakop sa iyang mga kauban human nga gipasanginlan nga nilungkab ug maoy nagkawat sa mga gidepositong mga armas diha sa Waterfront Police Station sa Dakbayan sa Sugbo.
Ang maong polis mao si Police Corporal Marlito Portugueza nga taga Dakbayan sa Talisay ug nadestino sa maong police station isip Assistant Investigator.
Matud ni Cebu City Police Office (CCPO) Director Police Colonel Engelbert Soriano nga adunay impormasyon silang nadawat kalabot sa nag-inom sa usa sa barangay nga sakop sa hurisdiksyon sa Waterfront Police Station nga nanghambog nga aduna kini armas nga napalit gikan ni Portugueza.
Imbentaryo
Tungod sa impormasyon, gimandoan ni Soriano ang hepe sa maong buhatan nga si Police Major Jomar Pomarejos pag-imbentaryo sa mga armas nga gitahan diha kanila.
Didto nasuta nga daghang mga armas nga gitahan kanila ang nangawala. Ang maong mga armas gitahan sa mga tagiya samtang nagproseso pa sa renewal sa ilang mga lisensya.
Gawas sa unang informant, ang mismong sulogoon sa maong police station ang nitug-an sab kang Pomarejos nga si Portugueza maoy nagkuha sa armas. Ug duna say higayon nga nihangyo ang suspek nga dunay lilion sa evidence room.
“Meron kaming evidence custodian na senior master sergeant there was a chance that he requested to check kung ‘pwede ko bang i check ‘yung mga firearms, one specific firearm.’ Dahil sa sobrang tiwala naman ng custodian dahil nga kasama sa station nagtiwala siya pinapasok siya, after that day napansin nila may nawawala,” matud pa ni Soriano.
Unauthorized entry
Pipila ka higayon nabantayan sa kapolisan nga adunay unauthorized entry o pagabli sa evidence room hinugdan nga nagduda na sila.
Pinaagi sa pakigalayon sa CCPO ug Integrity Monitoring Enforcement Group (IMEG) Visayas Field Unit nga gipangulohan ni Police Captain Neon Francis Alvarez gihimo ang pagdakop kagahapon sa kaadlawon kang Portugueza diha mismo sa sulod sa Waterfront Police Station.
Kasong robbery, administrative ug uban pang kaso ang atubangon ni Portugueza.
Posible sab apilon sa pasakaan og kasong grave misconduct ug negligence ang property custodian nga nagtugot kang Portugueza makasulod sa Evidence Room. Giingong unom pa ka armas nga gikawat sa maong polis ang nabawi na sa kapolisan gikan sa gibaligyaan niini.
Gipasalig sab ni Soriano nga walay special treatment nga ihatag ngadto sa dinakpan. Gisulayan pagkuha sa mga tigbalita ang habig ni Portugueza apan nagdumili kini pagatubang sa mga sakop sa media. /IBM (BANAT NEWS)