2 pulis sugatan sa ‘accidental firing’ sa training camp
MANILA, Philippines — Dalawang pulis ang nasugatan sa naganap na “accidental firing” sa loob ng police training school sa lalawigan ng La Union.
Kinilala ang dalawang pulis na nasugatan na sina Police Corporal Benie Dupayat, instructor at trainee nitong si Patrolman John Conrad Villanueva.
Batay sa report mula sa Police Regional Training Center 1, naganap ang insidente dakong, alas-3:30 ng hapon kamakalawa sa Andres Bonifacio Room ng Regional Traning Center-1 sa Barangay Poblacion, Aringay, La Union.
Itinuturo ni Dupayat sa kanyang trainee na si Villanueva ang firearms familiarization nang magkaroon ng gun malfunctioned at pumutok.
Tinamaan si Dupayat sa kamay habang sa hita naman si Villanueva na kapwa ginagamot sa PNP Regional Hospital.
Nabatid na ang firearms familiarization ay pagpapakita ng paggamit ng caliber.45 pistol na baril.
Pinaiimbestigahan naman ni Philippine National Police chief, Gen. Dionardo Carlos, ang nasabing incidente at kailangan na muling rebisahin ang polisiya sa pagtuturo sa paghawak ng baril upang maiwasan ang kahalintulad na insidente.
Aniya, ang baril ang pangunahing sandata ng mga pulis kaya dapat lamang na tama ang paghawak nito at may sapat na kaalaman ang nagtuturo.
- Latest
