Memphis umukit ng bagong NBA record
MEMPHIS, Tenn. — Binasag ng Grizzlies ang NBA record para sa pinakamalaking winning margin matapos ilampaso ang Oklahoma City Thunder, 152-79, kung saan siyam na players nila ang nagtala ng double figures.
Umiskor si Jaren Jackson Jr. ng 27 points para banderahan ang Memphis (12-10) na naglaro na wala si injured star guard Ja Morant.
Ang nasabing 73-point margin ng Grizzlies ang sumapaw sa 68-point win ng Cleveland Cavaliers kontra sa Miami Heat, 148-80, noong Disyembre 17, 1991.
Sa halftime pa lang ay nagtayo na ang Memphis ng 72-36 bentahe bago ibaon ang Oklahoma City (6-16) ng 78 points.
Sa Phoenix, nagtala sina Cam Johnson at Cameron Payne ng tig-19 points sa 114-103 pagtunaw ng Suns (19-3) sa Detroit Pistons at ilista ang franchise-record na 18 sunod na panalo.
Hawak ngayon ng Phoenix ang NBA best record at ang liderato sa Western Conference kasunod ang Golden State Warriors (18-3).
Sa Toronto, humugot si Fred VanVleet ng 13 sa kanyang 29 points sa fourth quarter at sinamantala ng Raptors (10-13) ang hindi paglalaro ni Giannis Antetokounmpo (sore right calf) ng nagdedepensang Milwaukee Bucks (14-9) para kunin ang 97-93 panalo..
Sa New York, kumamada si DeMar DeRozan ng 34 points at nag-ambag sina Zach LaVine at Nikola Vucevic ng tig-27 markers sa 119-115 pagsuwag ng Chicago Bulls (15-8) sa Knicks (11-11).
Sa Portland, nagsumite si Dejounte Murray ng 15 points, 13 assists at 7 boards para igiya ang San Antonio Spurs (7-13) sa 114-83 panalo sa Trail Blazers (11-12).
- Latest
