CEBU, Philippines - Ang host Cebu Normal University mihakot og 30 gold 22 silver ug 22 bronze medals aron mahimong virtual champion sa 2014 State Colleges and Universities Athletic Association (SCUAA) Regional Olympics diha sa Cebu City Sports Center.
Ang CNU gilangkuban sa mga dekalibreng atleta gikan sa tulo nila ka campuses dinhi sa Sugbo nga naglakip sa Balamban sa South ug Medellin sa North.
Mga atleta gikan sa State colleges sa rehiyon magtigi sa lima ka events lakip niini ang swimming, karatedo, taekwondo, table tennis ug athletics.
Ang top performers sa matag events ning tulo ka adlaw nga kompetisyon maoy morepresentar sa Rehiyon 7 alang sa National Olympics didto sa Manila sunod tuig.
Nagsunod sa CNU mao ang Negros Oriental State University (NORSU) nga adunay 15 gold, 15 silver ug 11 bronze medals, samtang ang Bohol Island State University nalandig sa ikatulo sa ilang 14 gold, 29 silver ug 25 bronze medals.
Laing state university sa Cebu, ang Cebu Technological University (CTU) mipugnit og duha ka golds, lima ka silvers ug 18 bronzes, gisundan sa Siquijor State College nga adunay 2-2-3 medal tally. (BANAT NEWS)