Sobra 7,000 nakabenepisyo sa service caravan

CEBU, Philippines — Kapin sa 7,100 ka mga Sugbuanon ang nakabenepisyo sa nagkalain-laing serbisyo, ayuda ug oportunidad sa panginabuhi atol sa “Handog ng Pangulo: Serbisyong Sapat para sa Lahat” nga gipahigayon sa Cebu Provincial Capitol niadtong Lunes, Sept. 14.

Gihiusa sa maong service caravan ang nagkalain-laing national government agencies ug mga opisina sa Capitol aron mas mapaduol sa katawhan ang mga serbisyo ug programa sa gobiyerno.

Gibanabana nga 3,000 sa mga benepisyaryo ang naka-access sa assistance ubos sa UPLIFT Program sa Department of Social Welfare and Development (DSWD), samtang mokabat sa 1,500 ang mitambong sa job fair.

Nikabat usab og 500 ang nakabenepisyo sa agricultural-related services, samtang ang uban nakadawat og tabang pinaagi sa scholarship programs, Technical Education and Skills Development Authority (TESDA), Overseas Workers Welfare Administration (OWWA) ug Tulong Panghanapbuhay sa Ating Disadvantaged/Displaced Workers (TUPAD) sa Department of Labor and Employment (DOLE).

Matud ni Cebu Governor Pamela Baricuatro, ang maong kalihokan usa ka paagi aron mas mapaduol ug mahimong mas accessible ang serbisyo publiko ngadto sa mga Cebuanos.

“Mao gyud kini ang tumong sa serbisyo publiko. Nga ang goberno mas duol, mas accessible ug mas responsive sa panginahanglan sa katawhan,” matud ni Baricuatro atol sa programa ug ceremonial turnover sa mga assistance gikan sa national government agencies sa Capitol Social Hall.

Gipahigayon ang service caravan isip kabahin sa pagselebrar sa ika-69 nga birthday ni President Ferdinand Marcos Jr., diin gihimong public service activities ang maong okasyon sa nagkalain-laing lugar sa nasud.

Nakig-teleconference usab si Marcos sa pipila ka mga kalihokan sa lokal nga pangagamhanan sa nagkalain-laing bahin sa nasud, diin nakadawat siya og mga greetings ug mensahe gikan sa mga opisyal ug benepisyaryo.

Sa maong higayon, gipasalamatan ni Baricuatro ang national government tungod sa suporta niini sa Cebu human sa mga kalamidad nga niigo sa probinsya niaging tuig.

Lakip sa mga ahensiyang miapil sa caravan ang Departments of Agriculture, Health, Labor and Employment, Social Welfare and Development, Trade and Industry, Education, Migrant Workers, Agrarian Reform, Justice ug Interior and Local Government.

Miapil usab ang National Senior Citizens Commission, Commission on Higher Education, TESDA, National Housing Authority, PhilHealth, Philippine Statistics Authority, Public Attorney’s Office ug Integrated Bar of the Philippines-Cebu City Chapter.

Nagbutang og service areas ang mga ahensya sa Capitol Grounds, Capitol Parking Lot I ug sa likod nga bahin sa Capitol aron maatiman ang daghang mga Cebuanos nga nangita og serbisyo ug assistance.

Gawas sa job fair ug agricultural services, gipahigayon usab ang medical checkups, pag-apod-apod sa mobility aids ug PWD identification cards, scholarship assistance, skills training ug uban pang social welfare ug livelihood programs.

Giapil usab sa programa ang suporta alang sa housing, agriculture ug gagmay nga negosyo, lakip ang mga programa sa National Housing Authority, Department of Agriculture ug Department of Trade and Industry. (BANAT NEWS)