Alex hahataw sa Asiad
MANILA, Philippines — Hahataw si Pinay tennis ace Alex Eala sa darating na 20th Asian Games sa Aichi-Nagoya, Japan.
Ito ang kinumpirma ni Team Philippines Chef De Mission Richard Lim sa muling paglalaro ng World No. 28 netter sa quadrennial event na nakatakda sa Setyembre 19 hanggang Oktubre 4.
“She will be playing in the singles and mayroon siyang isang kasama for the doubles also,” wika ni Lim sa panayam ng programang Sports Radio 918. “I’m not so particular with the name yet, but definitely she will be playing in the singles and doubles.”
Pumalo ang 21-anyos na si Eala ng bronze medal sa women’s singles at mixed doubles event kasama si Francis Alcantara sa 2023 Asian Games sa Hangzhou, China.
Isa si Eala sa mga inaasahang magbibigay ng medalya sa Pilipinas sa Aichi-Nagoya Asiad bukod kina 2024 Paris Olympics double gold medalist Carlos Yulo at defending pole vaulter champion EJ Obiena.
“I think we will surpass. Medyo confident kami about it. Siyempre, breaks of the game rin meron din nun. Pero looking at their performance, we are very positive we will surpass that,” dagdag ng karate association president.
Sa 2023 Hangzhou edition ay nag-uwi ang tropa ng kabuuang apat na golds, dalawang silvers at 12 bronzes para tumapos sa No. 17 place.
Ang nasabing apat na ginto ay nanggaling kina Obiena, Meggie Ochoa at Annie Ramirez sa jiu-jitsu at sa Gilas Pilipinas ni coach Tim Cone.
Humakot ang China ng 201 golds, 111 silvers at 71 bronzes para dominahin ang Asiad sa ika-11 sunod na pagkakataon.
- Latest
