Mga kapilian ni VP Sara
Gisugo sa Senado si Bise Presidente Sara Duterte sa pagtambong sa pagsugod sa iyang impeachment trial sa alas-2 sa hapon ugma. Pero gihatagan siya og duha ka kapilian: Mahimo nga siya mismo ang motambong; o mahimo sab nga suguon ang iyang mga abogado sa pagrepresentar niya.
Wala isulti sa pormal nga suwat ni Senate President Sherwin Gatchalian, isip presiding officer sa impeachment court, ang ikatulong kapilian ni VP Sara: Pag-isnab dili lang sa pagsugod kon dili sa tibuok gyod nga husay sa upat ka articles of impeachment batok niya.
* * *
Pero walay timaan nga mo-boykot si VP Sara sa husay. Bisan kon napapas nang mayoriya sa iyang mga alyado sa Senado. Nga nagpasabot nga, lahi niadtong Senate president pa si Alan Peter Cayetano, dili na niya makontrolar ang direksiyon sa husay. Sama sa pagpabasura sa mga pasangil sa dili pa mapresentar ang bisan usa na lang ka testigo o ebidensiya.
Karon, kapasaligan nang publiko nga dunay mahitabo nga husay. Sa gusto ni VP Sara o dili. Nalangay og usa ka tuig. Pero madayon na karong tuiga. Bisan sa tanang maniobra.
* * *
Kay walay kapilian si VP Sara. Kon dili moapil sa husay ang iyang mga abogado, bahala na kon dili motuman sa pasidaan nga duguon ang iyang pag-atubang sa senator judges, kay nakumbinser na tingali nga mosamot kaguba ang ilang depensa kon siyay mangunay sa pagtubag sa mga pasangil, makumbinser ang katawhan nga naglikay ug nikakak siya.
Ug motuo na sa mga pasangil batok niya. Hadlok si VP Sara nga labaw sa impeachment court ang court of public opinion.
* * *
Bugtong mahimo ni VP Sara mao ang paglangay sa proseso. Kuwestiyunon niya ang tanang pagsuway sa prosekusyon. Bisan sa pagpatuman sa klarong lagda sa Senado nga nagtugot sa private prosecutors sa pagpresentar og mga testigo batok niya.
Uban ang panghinaot nga kon malaygay ang husay manghuy-ab ang publiko sa kalaay. Ug dili na sama kadaghan ang interesado kon dili na kapugngan ang pag-abli sa joint bank account niya ug sa iyang amahan nga si kanhi Presidente Rodrigo Duterte. O kon kinahanglan na siya mo-resign, aron mahunong ang impeachment trial, kon klaro na siyang makonbikto.
* * *
- Latest
