CEBU, Philippines — Abante sa NBA Finals sa unang higayon sud sa 12 ka tuig
Ang San Antonio Spurs mipalayas sa Oklahoma City Thunder sa ilang trono uban ang 111-103 nga kadaogan sa Game 7 aron paghari isip bag-ong NBA Western Conference champion kagahapong adlawa didto sa Paycom Center sa OKC.
Si Victor Wembanyama maoy nangu sa Spurs, nga mitikang sa NBA Finals sa unang higayon sud sa 12 ka tuig. Ilang sangkaon ang Eastern Conference champion New York Knicks sa seguradong usa ka dumot nga rematch.
Ang Knicks mipildi sa Spurs, 124-113, sa NBA Cup final niadtong Disiembre sa miaging tuig didto sa Las Vegas.
Buot sab nga manimawos sa Knicks, nga gibuntog sa Spurs sa katapusang higayon nga nakaduwa sila og kampiyonato niadtong 1999.
Sa gihapon, ang 22-anyos nga si Wembanyama maoy bida sa Spurs uban ang 22 puntos ug pito ka rebounds. Ang impresibo niyang salida sa tibuok nga bahin sa best-of-seven series natukmod kaniya aron mamahimong West Finals MVP.
"Though we're still hungry for one more, this feeling is, I can't explain it, it's so powerful," matud pa ni Wembanyama. "We want four more. We're not done. Go Spurs go."
Si Wembanyama miposa og duha ka tres sa nagkayong 17-9 rally pagsugod sa katapusang kuwarter nga nakahatag sa Spurs og 11 puntos nga labaw, 97-86, sa pinal nga otso minutos.
Dako sab og naambag si Julian Champagnie, nga milansang og unom ka 3-pointers sa iyang 20 puntos, ingon man si Stephon Castle bitbit ang 16 puntos alang sa Spurs nga naglaraw mosakmit sa una nilang korona sukad niadtong 2014.
Si Shai Gilgeous-Alexander mipabuto og 35 puntos apan naminghoy ang back-to-back season MVP kay ang Thunder napakyas pagpanalipod sa ilang titulo.