Nuggets kinuha ang 1-0 lead sa Lakers

DENVER — Humakot si Nikola Jokic ng 32 points at 12 rebounds sa 114-103 pagdaig ng nagdedepensang Nuggets sa Los Angeles Lakers sa kanilang Western Conference playoffs opener.

Tumipa si Jamal Murray ng 22 points at 10 assists habang may 12 points at 11 rebounds si Aaron Gordon para sa 1-0 lead ng Denver sa best-of-seven series nila ng Los Angeles.

Umiskor si Anthony Davis ng 32 points at may 27 markers si LeBron James para pamunuan ang Los Angeles na winalis ng defending champions noong nakaraang season.

Matapos kumamada si James ng 19 points sa first half tampok ang pull-up three-point shot sa pagtatapos ng second period para sa 60-57 bentahe ng Lakers ay pinatahimik ng Nuggets ang NBA career scoring leader sa second half.

Ang tatlong triples ni Kentavious Caldwell-Pope sa 13-0 atake ng Denver ang nagbaon sa Los Angeles sa 89-74 sa third quarter.

Sa Minnesota, humugot si Anthony Edwards ng 18 sa kanyang 33 points sa third quarter para buhatin ang Minnesota Timberwolves sa 120-95 pagdaig sa Phoenix Suns sa first round ng kanilang playoffs.

Sa Cleveland, kumamada si Donovan Mitchell ng 30 points sa 97-83 pagtusok ng Cavaliers sa Orlando Magic sa kanilang Eastern Conference playoffs series.

Sa New York, umiskor sina Jaylen Brunson at Josh Hart ng tig-22 points para sa 111-104 panalo ng Knicks sa Philadelphia 76ers sa Game One ng kanilang ope­ning round playoffs.