Hidilyn sesentro na sa pamilya
CEBU, Philippines — Sesentro na ang atensiyon ni Tokyo Olympics gold medalist Hidilyn Diaz sa kanyang personal na buhay partikular na sa pagbuo ng pamilya kasama ang asawang si Julius Naranjo.
Nasa honeymoon stage na si Diaz ilang araw matapos mabigong makasikwat ng tiket sa Paris Olympics sa ginaganap na 2024 International Weightlifting Federation (IWF) World Cup na sa Phuket, Thailand.
May post si Diaz sa social media kung saan vacation mode na ito kasama si Naranjo.
“Now for the much needed family time. Dun tayo sa forever. God and family are forever,” ani Diaz sa kanyang post.
May mensahe rin si Diaz sa kanyang manager/ninong na si Noel Ferrer kung saan sinabi nitong posibleng magkaroon na ito ng apo sa Olympic champion.
“Ninong countdown na po to your apo,” ani Diaz.
Hindi pinalad na makapasok sa Paris Olympics si Diaz matapos ang dismayadong performance nito sa World Cup.
Sa halip, ang teammante nitong si Elreen Ando ang nakasiguro ng puwesto sa Paris Games bunsod ng impresibong ipinamalas nito sa Olympic qualifiers.
Masaya naman si Diaz sa tagumpay ni Ando na itinuturing na papalit sa trono nito.
Sa ngayon, ninanamnam ni Diaz ang magandang tanawin sa Phuket kasama si Naranjo na nagsilbi nitong personal trainer at coach sa mga nakalipas na taon.
- Latest
