Barili wa gihapo'y pilde sa Cabaron Cup volleyball

CEBU, Philippines — Sa ikatulong sunod-sunod nga semana, gipakyaw og daog sa Barili ang ilang mga duwa sa 1st Mayor Inocentes Cabaron Inter-Town Invitational Volleyball Tournament didto sa Moalboal covered court.

Ang mga pambato sa Barili mao na lang karon ang nagpabiling way pilde bitbit ang perpektong 3-0 rekord sa men's ug women's division ning torneyo nga nagdalit og P50,000 sa makampiyon.

Sa men's class, ang Barili mipakaging sa Badian 28-26, 25-11, samtang ang ilang women's team nanginahanglan usa og tulo ka sets sa wala pa pioga og Badian, 18-25, 25-20, 25-21.

Sila si John Cydric Bayang ug Rachaelus Nemeno misidlak sa ikatulong sagunson nga daog sa Barili, samtang ang mga babaye nilang katropa nga sila si Mylene Yuson, Aime Piape, ug Analie Canete mikuha sab og atensiyon.

Sa laing bahin, ang mga koponan sa host Moalboal nag-agi og managlahi nga dalan. Ang ilang men's team 3-0 na, samtang ang ilang women's team nasugamak sa una nilang kapildihan.

Ubos sa pagpangu ni playing team captain Dave Cabaron, ang Moalboal midaog sa first set, 25-21, ug dayon nagsandig ni Christian Jake Tabacon aron tiwasan ang Dumanjug, 25-23. 

Samatang si Chrisha Omagac mihatag sa Moalboal og sayong 8-2 nga labaw dayon na ngadto sa 25-14 nga kalamposan sa unang set batok sa Dumanjug.

Apan si Marlyn Yucada nagmangtas hinungdan nga miresbak ang Dumanjug sa ikaduhang set, 25-17.

Sa deciding set, si Juliana Gabales migiya sa Moalboal aron tablahon ang iskor, 20-20, apan si Yucada nanginit na sab aron ituboy ang Dumanjug ngadto sa kulbahinam ug makutas nga daog. Ang Dumanjug nagtangag na karon og 3-0 nga baraha sa women's category, samtang ang Moalboal natagak sa 2-1.