Junior Altas parang Ginebra —Thompson

MANILA, Philippines — Nakita ni Barangay Ginebra star guard Scottie Thompson ang kanilang bantog na ‘never-say-die’ spirit sa Junior Altas.

Ito ay matapos itakas ng University of Perpetual Help System ang dramatikong 91-90 panalo sa nagdedepensang Letran sa Game Two ng NCAA Season 99 juniors basketball finals noong Miyerkules.

“Down sila, but they never gave up. Para sa akin, they showed iyong ‘never say die’ spirit, so sobrang nakaka proud,” sabi ni Thompson na tumatayong team manager ng Perpetual juniors team.

Bumangon ang tropa ni coach Jop Cleofas mula sa isang 18-point deficit sa second period para agawin ang panalo sa koponan ni mentor Allen Ricardo.

Tumipa si JD Pagulayan ng 23 points at 10 rebounds at nagtala si MVP Amiel Acido ng 19 markers, 5 boards, 4 steals at 2 assists para itabla ang Junior Altas sa 1-1 sa kanilang best-of-three title series ng Squires.

Nauna nang natalo ang Perpetual sa Letran sa Game One, 80-97.

Ayon kay Thompson, inihahanda nila ang prog­rama ng high school team papunta sa collegiate squad.

“Nandito kami to help the school, especially as an alumni ng Perpetual,” wika ng 30-anyos na one-time PBA MVP. “Of course, bini-build namin iyong high school coming into college.”

Paglalabanan ng Junior Altas at Squires ang korona sa ‘winner-take-all’ Game Three bukas sa Filoil EcoOil Arena sa San Juan City.

Hangad ng Perpetual ang kauna-unahan nilang juniors title habang ang back-to-back para sa kabuuang 14 korona ang asam ng Letran.