Lebron mi-agak sa lakers ngadto sa usa ka milagro

CEBU, Philippines — Si LeBron James mikab-ot sa labing dako nga fourth-quarter comeback sa duha ka dekada niyang karera sa dihang ang Los Angeles Lakers mibangon human malubong og 21 puntos aron pakagigon ang silingan nilang Los Angeles Clippers, 116-112.

Ang 39-anyos nga NBA icon mipabuhagay og 34 puntos, 19 niini iyang gibubo sa katapusang kuwarter, aron agakon ang Lakers ngadto sa pagkadlit og milagrosong daog kagahapon didto sa Crypto.com Arena.

Nagdanga-danga na unta ang Lakers ngadto sa laing kapildihan human ang Clippers milayat ngadto sa 98-77 nga labaw sa pinal nga 12 minutos sa aksiyon.

Apan si James nagmangtas aron tabangan ang Lakers paglampaso sa Clippers sa ikaupat nga kuwarter, 39-16, nga nahimo nilang taytayan ngadto sa makapakurat nga pagbalitok.

"The game is not ever over until it's double zeroes (on the play clock)," matud pa ni James.   

Si James nakakuha og dakong suporta gikan ni Anthony Davis nga mihipos og 20 puntos ug 12 ka rebounds ingon man nilang D'Angelo Russell ug Rui Hachimura nga nagkumboya'g 31 puntos.

Si Kawhi Leonard ang nangu sa pilderong Clippers uban ang 26 puntos.

Sa laing duwa, si Nikola Jokic mitali sa ikaupat niyang sagunson nga triple-double sa dihang giyatak-yatakan sa Denver Nuggets ang Sacramento Kings, 117-96.   

Si Jokic miharos og 14 puntos, 14 ka rebounds, ug 11 ka assists alang sa ika-19 niyang triple-double ning season.

Ang Nuggets ikatulo gihapon sa Western Conference bitbit ang 40-19 nga baraha, samtang ang Kings natagak sa ikawalo uban ang 33-25 nga baraha.

Sa laing bahin, si Anthony Edwards mipatuasik og 34 puntos sa gihang gipaluhod sa Minnesota Timberwolves ang Memphis Grizzlies, 110-101.

Didto sa Toronto, si Luka Doncic mi-selebrar sa ika-25 nga sumad sa adlaw niyang natawhan uban ang 30 puntos sa iyang triple-double sa dihang gipayaka sa Dallas Mavericks ang Raptors, 136-125.