CEBU, Philippines — Si Victor Wembanyama mipakita og maanindot nga duwa apan sa gihapon nahoyhoy ang iyang abaga kay padayong misukarap ang San Antonio Spurs.
Ang gikaintapang No.1 overall pick sa miaging NBA Draft gikan sa France mipabuhagay og 27 puntos ug siyam ka rebounds apan nakawang na sab ang dalaygon niyang salida kay ang Spurs nahagba sa ikapitong sunod-sunod nga higayon human giparotan sa Sacramento Kings, 129-120, kagahapon didto sa Frost Bank Center sa San Antonio, Texas.
Si De'Aaron Fox mirehistro og career-high nga 43 puntos uban ang walo ka rebounds ug pito ka assists alang sa Kings. Mibomba siya og 14 puntos sa katapusang kuwarter aron kumpletohon ang impresibo nilang pagbalitok human malubong og 18 puntos sa unang kuwarter.
Sa laing sangka, si LeBron James mipabuhagay og 35 puntos aron pangulohan ang Los Angeles Lakers ngadto sa 107-95 nga pagpakaging sa Portland Trail Blazers.
Si Anthony Davis miamot og 16 puntos ug 14 ka rebounds alang sa Lakers nga sa usa ka higayon mi-abante og 17 puntos sa pinal nga 12 minutos sa aksiyon. Misidlak sab si Kevin Durant uban ang 38 puntos, apil na ang krusyal niyang 3-pointer sa katapusang 18.8 segundos nga naghatud sa Phoenix Suns ngadto sa 131-128 nga kadaogan batok sa Utah Jazz.
Wala sab magpabitin si James Harden nga maoy nahimong bayani sa alang sa Los Angeles Clippers, nga miputol sa unom ka sunod-sunod nilang pilde human giugbok ang Houston Rockets, 106-100.
Mao kadto ang una nilang daog sud sa lima ka duwa sukad naabot sa ilang poder si Harden pinaagi sa usa ka trade gikan sa Philadelphia 76ers.
Sa laing bahin, si Zion Williamson mi-iskor og 26 puntos sa dihang ang New Orleans Pelicans nakasugakod sa triple-double ni Nikola Jokic aron pakgangon ang defending champion Denver Nuggets, 115-110. Didto sa Toronto, si Boston guard Derrick miposa og tres sa pinal nga 27.5 segundos aron aswaton ang Celtics ngadto sa kulbahinam nga daog batok sa Raptors, 108-105.
Sa Charlotte, si Damian Lillard mikadlit og 27 puntos aron ituboy ang Milwaukee Bucks ngadto sa 130-99 nga paglampornas sa Hornets.