Team Philippines padayong miabante sa WORLD CUP of POOL
Nagpabilin pa gihapon sa championship race ang gikonsiderar nga wala mailhing Team Philippines nga nisalmot sa World Cup of Pool alang sa ikaupat nga korona para sa nasud.
Silang James Aranas ug Johann Chua nakaipsot sa tungason kaayong kombate batok sa managsuong Taiwanese nga silang Pin Yi ug Ping Chung Ko, 9-8 didto sa Pazo de Feiras E Congresos de Lugo sa Spain niadtong Sabado sa gabii.
Kulbahinam ang kadaogan sa duha sa race-to-9 match tungod kay nagtabla sila sa ilang kaatbang 8-8 rack.
Una niini, 8-2 na unta ang napupo sa mga Pinoy, apan migana ang depensa sa mga Taiwanese pinaagi sa pagtago sa bola mano hangtud nga nailog gyud nila ang ika 11th rack.
Gikan niadto, sagunson nga gi-clean up sa Taiwanese ang lamesa aron makatabla 8-8. Tungod ba kaha sa swerte ang mga Pilipino cuers ug gidemalas ang Taiwanese, nasipyat ang naulhi sa No. 2 nga bola sa kataposang rack.
Diha na miarangkada sila Chua ug Aranas aron ilogon ang labaw hangtud nga nahawan ang lamesa nga maoy nagdala kanila ngadto sa semifinals.
Ang sunod nilang makasangka mao ang mananaog tali sa Great Britain ug Austria sa quarter finals.
Gipaabot pa sab ang resulta sa duwelo tali sa Germany batok Poland ug China batok Japan.
Una niini, gidispatsar nilang Aranas ug Chua ang host country sa race-to-7, apil niini ang 7-2 rout sa 2022 champions Spain B, human nila gidispatsar sab ang Spain a, 7-5 niadtong nakalabay nga adlaw nga Martes.
Gawas sa korona, makadaog ang mokampeyon og $60,000.
Kataposang nahuptan sa Pilipinas ang korona niadtong 2013 pinaagi nilang Dennis Orcollo ug Lee Van Corteza sa London (ikatulo para sa Pilipinas).
Ang billiard legend nga si Efren “Bata” Reyes ug Francisco “Django” Bustamante maoy naghari sud sa tulo ka tuig sugod 2006 sa Wales hangtud 2009 nga diri sa Pilipinas gipahigayon.— /IBM
- Latest
