Tszyu modemolis ni Ocampo sud lamang sa 72 segundos
CEBU, Philippines — Ang Australyanong power-puncher nga si Tim Tszyu mi-iskor og makapakurat nga knockout sud lamang sa usa ka hugna batok sa Meksikanong si Carlos Ocampo aron pagpabiling WBO super welterweight champion kagahapong adlawa.
Tungod niini, gipahayagan ni Tszyu ang iyang tsansa nga makasangka si undisputed champion Jermell Charlo.
Ang 28-anyos nga si Tszyu mi-ataki dayon ni Ocampo bisan og bag-ohay pa kining na-operahan human napakaakan og iro.
Mipatupa siya og makusog nga tuong mga suntok ug solidong left hook nga nakatumba ni Ocampo duha ka higayon hinungdan nga ang ilang away nahuman sud lamang sa 72 segundos.
Si Tszyu nakakonektar og 14 ka mga suntok, samtang ang nakugang nga Meksikano wala makalandig bisan og usa ka kumo.
"I think it was a statement made. America is the land I want to conquer, the land I'm going to next, the big one is coming," matud pa ni Tszyu. "I've got the interim belt, but I'm not satisfied. I want all four. I want the name Charlo on my resume."
Si Tszyu miinat sa perpekto niyang record ngadto sa 23-0 nga gidayan-dayanan na karon og 17KOs. Labaw sa tanan, giposisyon niya ang iyang kaugalingon isip mandatory challenge ni Charlo nga nagkupot og 35-1-1 nga baraha uban ang 19KOs.
Sila si Charlo ug Tszyu gikatakda na untang magbugno didto sa Las Vegas niadtong Enero apan ang pagdepensa ni Charlo sa upat niya ka mga bakos nasibog human nabuak ang wala niyang kamot atol sa training.
Sa kadaogan ni Tszyu, lagmig mag-bangga na gyud sila n Charlo ibabaw sa ring sa dili pa matapos ang tuig.
- Latest
