Donling kampiyon sa Javier Ceramics Cup 2023

CEBU, Philippines — Determinasyon uban ang paningkamot maoy gihimong hagdanan sa Donling Aircon and Refrigeration Services aron makab-ot ang ilang bulawanong pangandoy, ang korona sa Javier Ceramics Cup 2023.

Kini human ang Donling nidaog batok sa JMD Automotive sa finals, 67-64 niadtong Domingo diha sa old Sacred Heart School gym sa Mango Avenue, Cebu City.

Si Kenn Rolf Nunez nga napiling finals MVP mikamada'g 27 puntos, walo ka rebounds ug siyam ka assists maoy nangu sa Donling, kansang daog magsilbe sab nga bawos ngadto sa JMD nga mipilde kanila atol sa finals sa Zynergia Cup 2023 niadtong Pebrero.

Si Nunez otomatik nga nadala sa Mythical 5 uban sa iyang teammate ug Season MVP Roldan Daug, Lucky Mendoza sa JMD, Jeffrey Francisco sa Jot Trucking, Rico Rosaroso sa Cake and Memories.

Si Kenaz Balderas mitampo’g 14 puntos, apil na ang iyang back-to-back fastbreak nga naghatag og komportabling labaw sa Donling ni Romeo 'Don' Quilaton Jr., 67-60 sa nahabiling 2.30 segundos sa duwa.

Misuway og gukod ang JMD, apan ulahi na ang ilang mga paningkamot kay nahutdan na sila sa oras.

Ang JMD ni Gerald Dilao gipangulohan ni Victor Dungog sa iyang 18 puntos.

Sa gubat alang sa ikatulong dapit ning maong liga nga giorganisar sa Brothers Ball League, ang Jot Trucking mipukan sa Cake and Memories sa iskor nga 57-46.

Ang Jot Trucking ni Jeffrey Tagacanao gipangulohan ni Jason Inocensio sa iyang 14 puntos, samtang ang Cake and Memories ni Allan Paris Caballes gipangulohan sab ni Ernie Ygot nga dunay 10 puntos.