Team Fuentes labing unang kampiyon sa Badbeat Basketball League
CEBU, Philippines — Ang Team Fuentes milugwa nga labing unang kampiyon sa Badbeat Basketball League (BBL) nga gipaluyohan sa Dimsum Break.
Luyo sa liderato ni Antonio Mella Jr., ang Team Fuentes madasigon nga namawi human maalkansi og 12 puntos sa unang kuwarter dayon na ngadto sa pagpatikalbong sa Kokolay, 69-59, sa tinagakay nilang final match aron birahon ang makasaysayanong korona ning bag-ohay pa lamang didto sa Sacred Heart Sports Center.
Si Mella mipupo og 14 puntos, unom ka rebounds ug upat ka assists alang sa Team Fuentes hinungdan nga gibayaw siyang Finals MVP.
Ang Team Fuentes nalubong sa sayong bahin sa duwa, 11-23, apan nakasikit ngadto na lang sa dos puntos sa halftime, 31-33, sa wala pa milusad og mainit nga resbak sa ikatulong kuwarter aron ilogon ang labaw, 52-43, ug kontrolahon ang duwa sa hingpit.
Wala na molingi pa ang Team Fuentes sukad niadto aron silyohan ang 10 puntos nilang kadaogan.
Si Jhunwil Tubaon mitagak og 21 puntos uban ang pito ka rebounds ug lima ka assists apan nakawang ang iyang paningkamot sa habig sa Kokoklay.
Duna hinoon gihapoy angayan nga ikalipay si Tubaon gumikan kay gipasidunggan man siya nga season MVP. Giduyogan siya sa Mythical Five nilang Keith Enriquez sa Candy Paint, Chris Sabellano sa Go Online Solution, Jerry Singson sa Wagas & Estorgio Law Firm, ug Jacob Esperanza sa Team Fuentes.
- Latest
