Philippines BEST hakot ng 5 ginto sa World Juniors qualifiers

MANILA, Philippines — Magarbong tinapos ng Behrouz Elite Swimming Team (BEST) Philippines ang kampanya nito sa 58th Malaysia Invitational Age Group Swimming Cham­pionships na ginanap sa National Aquatic Center Kuala Lumpur Sports Complex sa Bukit Jalil.

Pinakamaningning sa lahat si Brent International School standout Micaela Jasmine Mojdeh na humakot ng tatlong ginto at dalawang pilak na medalya sa girls’ 15-17 category.

Nakasungkit ng gintong medalya ang 2022 World Junior Championships semifinalist sa 400m Individual Medley (5:07.42) sa opening day kasunod ang 100m butterfly (1:03.23) sa second day at 200m butterfly (2:19.60) sa third day.

Nakapilak pa si Mojdeh sa 200m breaststroke (2:45.44) at 200m IM (2:25.37) sa torneong nilahukan ng mga swimmers mula sa United States, Russia, Singapore, Thailand, Vietnam, Mongolia, India, Indonesia, Myanmar at host Malaysia.

Nagparamdam din ng puwersa si International School for Better Beginnings student Yugo Cabana na humirit naman ng dalawang ginto sa boys’ 11-12 class.

Kumana ang Lucena City pride ng ginto sa 200m butterfly (2:25.75) at 200m Individual Medley (2:25.02) sa four-day meet na quali­fying event para sa World Junior Championships.

Umani pa si Cabana ng tansong medalya sa 100m butterfly (1:04.33).

Maliban kina Mojdeh at Cabana, nakasiguro pa ng medalya sina World Junior  Championship veteran Ruben White at Lucena City tanker Peter Dean sa kani-kanyang events.

Pumangalawa si White sa boys’ 18-25 50m freestyle sa bendisyong ng impresibong 23.50 segundo habang tumersera naman si Dean sa boys’ 50m backstroke (28.35).