Jot Trucking mihakot ikaduhang daog sa 1st Zynergia Cup
CEBU, Philippines — Ang Jot Trucking mihakot sa ilang ikaduhang daog pinaagi sa paglubong sa JMD Automotive, 81-68 sa 1st Zynergia Cup 2023 niadtong miaging semana diha sa CEC gym.
Gipangulohan ang daog sa best player niining si RJ Bautista nga mikolekta og 12 puntos, upat ka rebounds ug tulo ka assists. Ikaduhang topscorer mao si Arjay Mendoza nga adunay 11 puntos.
Ang Jot Trucking ni Jeffrey Tagacanao nakakuha sab og igong suporta gikan nilang Romnick Romo, Rheymond Opena ug Jeffrey Francisco nga mihabwa'g 10 puntos matag usa alang sa ilang 2-2 nga baraha.
Si Lucky Ergiel Mendoza mao sab ang nangu sa JMD pinaagi sa iyang 21 puntos, gisundan ni Joemarie Arupo nga adunay 20 puntos, samtang sila si Ariel Pepito ug Roel Villaganas nagtampohay og 10 puntos sa team ni Gerald Dilao nga kausa pa nakatilaw og daog sa upat ka duwa.
Sa bahin, si Jhan Brixter Villarias nagmangtas og maayo diin mipahaguros kini’g 28 puntos aron pangulohan ang Violex Trading nga mipahamtang og laing kapildihan sa Domelsky Water Refilling Warriors, 88-80.
Milangkat sab siya og walo ka rebounds ug tulo ka assists aron ilhon isip best player of the game.
Sila si Duane Manacap ug VM Cempron mitampo’g 11 puntos matag usa alang sa Violex ni CJ Cardenas nga nagsolo karon sa ikaduhang dapit sa standing sa ilang 3-1 record.
Mikandos unta og 26 puntos ang team manager sa Domelsky nga si Melchor Almonicar, apan nakawang kini kay napilde man ang iyang koponan nga pabilin gihapong walay daog sa upat ka duwa ning maong liga nga giorganisar sa Brothers Ballclub.
Sila si James Basan ug Raffy Panganiban nag-amotay og 18 ug 12 puntos matag usa.
- Latest
