Dwight Howard moduwa sa Taiwan

CEBU, Philippines — Ang eight-time NBA All-Star nga si Dwight Howard gikatakda nga moduwa uban sa usa ka commercial team didto sa Taiwan sugod sunod semana.

Sul-oton ni Howard ang uniporme sa Taoyuan Leopards sa T1 league, nga na-establisar niadto lamang miaging tuig ug maoy labing bata sa tulo ka mga propesyonal nga liga sa basketbol didto sa Taiwan.

"I am so excited. I can't wait to touch down in Taiwan and start playing," matud pa ni Howard nga pormal nga ipaila-ila sa Leopards karong Sabado. "I can't wait to see the fans, eat the food and have the best time ever, and bring the championship for Taoyuan city."

Si Howard nakapakita'g aksiyon sud sa 18 ka seasons sa NBA ug nakadaog og kampiyonato uban sa Los Angeles Lakers niadtong 2019-2020 season.

Nahimo siyang free agent human miduwa sa Lakers sa miaging 2021-2022 season diin siya mi-average og 6.2 puntos ug 5.9 rebounds matag duwa.