Sarok Weavers andam mosidlak ubos sa presyur

CEBU, Philippines — Andam silang mosidlak ubos sa presyur ug mosagubang sa hagit nga nag-atang kanila sa unahan.

Mao kini ang linyada sa huna-huna sa Consolacion Sarok Weavers sa dihang modepensa sila sa ilang titulo sa Pilipinas Super League (PSL) Under 21 Aspirants Division Second Conference nga gikatakdang sugdan karong Hulyo 2 didto sa Cebu City Sports Institute.

Duha ka bulan ang milabay didto sa Roxas, Zamboanga del Norte, ang Sarok Weavers mihimo og kasaysayan human ilang gi-sweep ang host Roxas Vanguards sa ilang best-of-three finals aron mamahimong labing unang kampiyon sa PSL U21.

Sa ilang pagtirada alang sa duha ka sagunson nga korona, lahi na ang tahas nga pas-anon sa Sarok Weavers ning higayona.

Gawas nga manalipod sa ilang trono atubangan sa ilang mga katagilungsod, lima ka lain pang Cebu teams ang mobangga kanila. Kini mao ang ARQ Builders Lapu-Lapu City Chiefs, Sherilin-Unisol Mandaue, Bogo City Bogoys, San Fernando Buffalos, ug Team Barili.

Duna pay upat ka lig-ong puwersa gikan sa Mindanao ang manulong dinhi nga mao ang Davao Occidental Dreamers, Davao del Norte Future Hopes, Bukidnon Cowboys, ug Cagayan de Oro Sealcor Kingfishers.

Gawas niini, wala na sab ang upat nila ka mga sinaligan nga sila si PSL inaugural season Most Valuable Player Gyle Patrick Montano, Finals MVP Rojan  Montemayor, big man Mathhew Flores ug Neon Chavez. Bag-o na sab ang ilang head coach nga si Lee Mhar Dahil.

Apan ang Sarok Weavers nagpanikad nang mopas-an sa mabug-at nilang tahas.

"The pressure is always there even during the last season so the pressure is something we already know how to handle. And I'm so proud of my boys since they shine under pressure," matud pa ni Sarok Weavers team manager Marc Malazarte.

"We have made some adjustments though in our team considering that we have new faces and new head coach, but since coach Lee Mhar has been with us from the start of last season, we will be running the same system. And with the guidance of our team consultant/coach Paul Alelu Flores, our transition has been smooth sailing," dugang pa ni Malazarte. "One thing we could guarantee is that we will be giving our 100 percent inside the court."

Sama sa miagi nilang kampanya, si Malazarte nagkanayon nga ang numero uno nilang tumong mao ang kampiyonato.

"I would lie to myself if I would say that we are not aiming for the championship. It would be useless for us to join this season if defending the crown isn't our number one goal," dason pa ni Malazarte . "We know this will not be easy. It will be even harder because everyone wants to slay the champs. But we are very much up for the pressure and give our all in every game."

Si coach Paul Alelu Flores, nga nakaduwa uban ni PBA superstar Arwind Santos atol sa bulawanon nilang mga tuig sa Far Eastern University (FEU) Tamaraws diin sila nakadaog og duha ka sagunson nga kampiyonato niadtong 2004 ug 2005 UAAP seasons, mipadayag og susamang sentimento.

"We know that the challenge to defend our crown is not easy especially that we lost some of our key players," buhagay pa ni Flores. "But we trust on our system. We will give our best as a team in the hope of keeping our title and make our fellow Consolacionanons proud again."