Grupo sa mga basketball reperi naporma sa Consolacion

CEBU, Philippines — Ubos sa paggiya ni multi-titled coach Delfin "Jun" Pepito Jr., usa ka grupo sa mga basketball reperi ang naumol sa Consolacion.

Pagatawgon nga COBRA kon Consolacion Basketball Referees Association, tahasan kini pag-officiate sa umaabot nga mga torneyo sa lungsod.

Ang COBRA gipangulohan sa presidente niining si Restituto Tumongha.

Isip inisyal nilang kalihukan, ang COBRA mipahigayon og usa ka adlaw nga training seminar alang sa mga reperi ug table officials niadtong Huybes sa Consolacion municipal gym.

Si Pepito, usa ka tinamod nga champion player ug coach sa iyang panahon uban sa University of the Visayas (UV) Green Lancers, nagkanayon nga mi-abag pagpadagan sa ilang workshop mao sila si PBA referee Jerry Narandan, Reggie "Jing" Lutao, Aurelio Eslawan, Undo Mantuhac, Roque Umije, ug Jeosie Narandan.

Ang labing unang trabahoon sa COBRA mao ang age-group tournament nga pasiugdahan ni Pepito alang sa mga partisipante sa libre niyang training camp nga hugtanong  gipaluyohan nilang Consolacion Mayor Joannes "Joyjoy" Alegado ug vice mayor Teresa "Nene" Alegado. Mahitabo kini sa sa naghinapos nga bahin ning bulana o sa unang semana sa Mayo.