Harden nagpasikat sa kanyang debut sa 76ers
MINNEAPOLIS - Kumolekta si James Harden ng 27 points, 12 assists at 8 rebounds sa kanyang debut para sa Philadelphia 76ers para patumbahin ang Minnesota Timberwolves, 133-102.
Humakot si center Joel Embiid ng 34 points at 10 rebounds para sa 76ers (36-23) na nanatili sa No. 3 spot sa Eastern Conference.
Hindi sumabak si Harden sa unang dalawang laro ng Philadelphia matapos ang trade sa Brooklyn Nets dahil sa kanyang hamstring injury.
Pinamunuan ni Karl-Anthony Towns ang Minnesota (32-29) sa kanyang 25 points.
Sa Phoenix, nagpaputok si CJ McCollum ng 32 points sa pag-akay sa New Orleans Pelicans (24-36) sa 117-102 pagdaig sa NBA-leading Suns (49-11).
Sa New York, humataw si Tyler Herro ng 25 points at may 23 markers si Jimmy Butler sa 115-100 paggupo ng Miami Heat (39-21) sa Knicks (25-35) para sosyohan ang Chicago Bulls sa liderato ng Eastern Conference.
Sa Los Angeles, umiskor si Terance Mann ng 19 points at sa fourth quarter sa 105-102 paglusot ng Clippers (31-31) sa Lakers (27-32).
Sa iba pang laro, wagi ang Oklahoma City Thunder sa Indiana Pacers sa overtime, 129-125; lusot ang San Antonio Spurs sa Washington Wizards sa overtime, 157-153; at binigo ng Orlando Magic ang Houston Rockets, 119-111.
- Latest