Simmons gisuspenso sa Sixers
CEBU, Philippines — Gisuspenso sa Philadelphia 76ers ang All-Star guard niining si Ben Simmons og usa ka duwa.
Tungod niini, si Simmons dili makapakita’g aksiyon sa season-opening game sa Sixers batok sa New Orleans Pelicans karong adlawa.
Sa usa ka opisyal nga pamahayag, ang Sixers nagkanayon nga ilang gisilotan soi Simmons gumikan sa binuhatan niini nga dili makiangayon sa team.
Apan sigun sa nanglugwa nga mga taho, si Simmons gisuspenso human sila nagkabangi ni coach Doc Rivers nga miresulta ngadto sa pagpapahawa ni Simmons sa ilang praktis.
Ang maong hitabo seguradong makaduhang og samad sa nagusbat nang daan nga relasyon tali sa Sixers ug ni Simmons.
Ang 25-anyos nga si Simmons daan nang mipahibawo nga gusto niyang molayas sa poder sa Sixers.
Ug kay wala man matuman ang gihandum niyang trade, si Simmons napugos pagbalik sa Sixers nga mikuha kaniyang No.1 overall pick niadtong 2016 NBA Draft.
Hangtud karon, wala pay klaro kon unsay ugma nga nagpaabot ni Simmons uban sa Sixers nga gitiwasan pa ning labing uwahing hitabo.
Gawas ni Rivers, duna say tensiyon tali nilang Simmons ug Joel Embiid, ang labing lig-on nga pambato sa Sixers.
Si Embiid nagkanayon nga wala silay labot kon unsay gustong buhaton ni Simmons kay andam ug preparado sila sa kanunay nga mokumbati ning NBA season bisan og dili moduwa uban kanila ang Australyano nilang teammate.
"At this point I don't care about that man, honestly," buhagay pa ni Embiid kabahin ni Simmons. "He does whatever he wants. That's not my job. I'm only focused on trying to make the team better, win some games, play hard every night, trying to lead the guys that we have here."
- Latest
