National karatekas maagang magtutungo sa France
MANILA, Philippines — Mas maagang magtutungo ang mga national karatekas sa Paris, France para sumabak sa World Karate Championship, ang pinakahuling qualifying tournament para sa 2021 Olympic Games.
Ito ay dahil sasailalim pa sina 2019 SEA Games gold medalist Jamie Lim, Fil-Am Joane Orbon, Ivan Agustin, Shariff Afif, Joco Vasquez, Sarah Pangilinan at Jason Macaalay sa isang 10-day quarantine.
Napuwersa sina Lim, Orbon, Agustin, Afif, Vasquez, Pangilinan at Macaalay na tapusin ang kanilang training camp sa Istanbul, Turkey.
“Supposed to be naka-book kami ng June 7 papuntang France, iyon talaga ang plano,” sabi ni Karate Pilipinas president Richard Lim sa panayam ng PTV Sports. “Kaso nga sinabi ng French Government na kailangan kaming dumating ng mas maaga dahil we have to fulfill the 10-day quarantine.”
Inaasahan ding makakasama ng grupo si 2019 SEA Games gold medal winner Fil-Japanese Junna Tsukii para sa Olympic qualifying sa Hunyo 11-13.
Ang top three karatekas sa bawat weight category ang magku-qualify sa 2021 Olympics na nakatakda sa Hulyo 23 hanggang Agosto 8 sa Tokyo, Japan.
Umakyat si Tsukii sa No. 8 sa world rankings ng female kumite -50 kilogram division matapos pagreynahan ang World Karate Federation (WKF) Premier League sa Lisbon, Portugal.
- Latest
