Celtics abante sa playoffs
CEBU, Philippines — Si Jayson Tatum mipabuto og 50 puntos sa dihang ang Boston Celtics misakmit og luna sa Eastern Conference playoffs human gibugha ang Washington Wizards, 118-110, sa NBA play-in tournament kagahapon didto sa TD Garden sa Boston, Massachusetts.
Gumikan niini, ang Celtics mitikang sa unang hugna sa playoff series diin silang sangkaon ang No.2 seed Brooklyn Nets nga gipangulohan nilang Kevin Durant, Kyrie Irving, ug James Harden.
Buhi pa hinoon ang Wizards nga mo-host sa Indiana Pacers sa tinagakay nga duwa karong Biyernes. Ang Pacers naka-angkon pa og laing kinabuhi human gipalagpot ang Charlotte Hornets, 114-117, luyo nilang Oshae Brissett ug Doug McDermott nga nagkumboya og 44 puntos. Ang modaog sa ilang sangka maoy mohagit sa top seed nga Philadelphia 76ers sa playoffs. Ang Celtics alkansi og dos puntos sa halftime, 52-54, apan sila si Tatum ug Kemba Walker nagmangtas sa ikatulong kuwarter diin ilang gilabhan ang Wizards, 38-26, hinungdan nga sila maoy nagkontrola sa duwa.
Sa usa ka higayon, ang Celtics naglabaw og 16 puntos ug wala na molingi pa sukad niadto.
Gawas sa bagsik niyang opensiba, si Tatum, nga way sipyat sa 17 niya ka free throws, duna say walo ka rebounds ug upat ka assists. Si Walker mibahug og 29 puntos samtang si Tristan Thompson miposte og 12 puntos ug 12 sab ka rebounds alang sa Celtics.
Si Bradley Beal maoy nangu sa Wizards uban ang 22 puntos samtang si Russell Westbrook mitali og 20 puntos apan mipasud lamang og unom sa 18 niya ka itsa.
- Latest
