Raptors-Celtics series 2-2 na
Nuggets rumesbak sa Clippers
LAKE BUENA VISTA, Florida -- Hindi papayag ang nagdedepensang Toronto Raptors na mabaon sila sa isang semifinals series.
Kumamada si forward Pascal Siakam ng 23 points at 11 rebounds at tumipa si guard Kyle Lowry ng 22 points at 11 boards para pamunuan ang Raptors sa 100-93 pagdaig sa Celtics sa Game Four ng kanilang Eastern Conference semis showdown kahapon dito.
Dalawang araw matapos itakbo ang Game Three mula sa buzzer-beating three-point shot ni OG Anunoby ay matinding depensa lamang ang ginawa ng Toronto para patahimikin ang mga perimeter shooters ng Boston, partikular na si Jaylen Brown.
Nagdagdag si center Serge Ibaka ng 18 points, habang kumolekta si guard Fred VanVleet ng 17 points, 6 rebounds at 6 assists para sa Raptors.
Pinamunuan naman ni Jayson Tatum ang Celtics sa kanyang 24 points at 10 rebounds habang may 15 markers at 8 assists si Kemba Walker.
Samantala, inangkin ng Denver Nuggets ang 110-101 panalo laban sa Los Angeles Clippers sa Game Two para itabla sa 1-1 ang kanilang semis wars.
Humataw si Jamal Murray ng 27 points at nagtayo si center Nikola Jokic ng 26 markers at 18 rebounds para banderahan ang Nuggets.
Umiskor naman si Paul George ng 22 points bukod sa kanyang 8 rebounds at 3 assists para sa Clippers.
- Latest
