Raptors mibawos og Anunoby bayani sa kadaogan pinaagi sa buzzer-beating 3-pointer
CEBU, Philippines — Mitaop ang gitira nga buzzer-beating 3-pointer ni OG Anunoby nga nakapabuhi og balik sa Toronto Raptors pagdepensa sa ilang titulo sa National Basketball Association.
Kini human ang defending champion nga Raptors nakabawos ngadto sa Boston Celtics sa iskor nga 104-103 sa kulbahinam nga Game-3 sa ilang "best-of-seven" NBA Eastern Conference semifinals kagahapon didto sa Orlando, Florida.
Si Kyle Lowry nga maoy gitahasan pag-inbound sa bola sa nahibilin nga punto singko segundo sa duwa diin ang Raptors alkansi og dos puntos, 103-101, mihapos og perpektong pasa ngadto ni Anunoby sa pikas nga bahin sa iyang nahimutangan.
Human nadawat ang bola, miitsa dayon si Anunoby gikan sa 3-point area dayong kapupos sa oras. Mao kini ang hinungdan sa paglumpayat niya ug sa iyang kaubanan sa tumang kalipay.
Ang Raptors dunay igong rason nga magselebrar sa makapaiosa'g balahibo nilang kadaogan nga nakapasikit kanila sa Celtics, 2-1.
Kini gumikan kay kon napilde na usab sila, wala pa'y team sa kasaysayan NBA nga nakabangon human malubong og 3-0 sa usa ka serye.
Si Anunoby mitapos sa duwa uban ang 12 puntos.
Si Lowry maoy nangu sa Raptors pinaagi sa iyang 31 puntos, unom ka rebounds ug walo ka assists.
Dako sab og natampo si Fred VanVleet nga miposa og 17 sa iyang 25 puntos sa second half ug ingon man si Pascal Siakam nga mitali og 14 sa iyang 16 puntos human sa halftime diin sila alkansi og 10 puntos, 57-47.
Nangu sa pilderong Celtics mao si Kemba Walker nga adunay 29 puntos, gisundan ni Jaylen Brown miamot og 19 puntos uban ang 12 ka rebounds ug Jayson Tatum nga mitampo'g 15 puntos.
Sa laing aksiyon, si Kawhi Leonard mipabuto og 29 puntos sa dihang gilubong sa Los Angeles Clippers ang Denver Nuggets sa iskor nga 120-97 sa Game-1 sa ilang "best-of-seven" Western Conference semifinals.
Miabag sab sa maong kadaogan sila si Paul George ug Marcus Morris nga nagkumboya'g 37 puntos.
- Latest