Sixers mitaktak ni coach Brown

CEBU, Philippines — Usa ka adlaw human sila gi-sweep sa Boston Celtics sa unang hugna sa NBA playoffs niadtong Lunes, gitaktak sa Philadelphia 76ers ang ilang head coach nga si Brett Brown.

Sud sa pito niya ka tuig uban sa Philadelphia, si Brown miposte og 221-344 win-loss record. Iyang gitimon ang 76ers ngadto sa playoffs sa miaging tulo ka seasons.

Mapasalamaton hinuon ang 76ers sa mga natampo ug nabuhat ni Brown sa ilang organisasyon. Apan alang ni 76ers general manager Elton Brand, panahon na nga moadto sila sa laing direksiyon ilabi na kay pakyas sila pagkab-ot sa ilang tumong.

Nakataak man tuod sa playoffs sa miaging tulo ka seasons, apan ang 76ers kutob lamang sa Eastern Conference semifinals.

Sa pagbalik sa aksiyon sa liga human nahunong sud sa upat ka bulan gumikan sa pandemiya ning tuiga, napiangan og maayo ang 76ers human ang pambato nilang guwardiya nga si Ben Simmons nakahiagum og seryosong injury sa tuhod.

Matud pa ni Brand nga mangita dayon sila og bag-ong coach sa labing dali nga panahon.