Sangka nilang Tyson ug Jones gisibog
CEBU, Philippines — Gisibog sa Nobiyembre ang giatngan nga comeback fight sa 54-anyos nga si 'Iron' Mike Tyson batok ni Roy Jones Jr., 51-anyos.
Ang sangka gikatakda unta karong Septiyembre 12 didto sa Dignity Health Sports Park sa Carson, California.
Si Ryan O’Hara sa Ring Magazine misuwat sa iyang Twitter kagahapon nga ang walo ka hugna nga exhibition bout tali nilang Tyson ug Jones mahitabo karon nang Nobiyembre 28.
Wala na mohatag pa og ubang detalye si O'Hara apan si T.J. Rivers sa bigfightweekend.com mitaho nga segun sa kasaligan niyang tinubdan, ang usa sa labing dako nga isyu kabahin sa pagpahigayon sa maong sangka mao ang pinansiyal nga aspeto sa promosyon.
Matud pa ni Rivers nga kon walay kita sa live gate kay gidid-an pa man ang mga fans pagtan-aw sa mga away sa binyu taliwala ning pandemiya, tataw nga maalkansi og dako ang nagpasiugda sa maong pasundayag. Sa pangagpas ni Rivers, tingali'g naghuwat una ang mga promoters nga maabot ang panahon nga tugotan na ang mga fans nga makasud sa binyu aron duna sila'y dugang kita gawas sa halin sa pay-per-view. Samtang ning pagsulat, sila si Tyson ug Jones wala pa mihatag og komento kabahin sa pagka-usab sa iskedyul sa ilang sangka.
- Latest
