Humahamon kay Pacquiao binalaan
MANILA, Philippines — Binalaan ng isang boxing analyst ang mga humahamon kay eight-division world boxing champion Manny Pacquiao na itinuturing na isang legend sa larangan ng boxing.
Partikular na tinukoy sina World Boxing Council (WBC) at International Boxing Federation (IBF) welterweight champion Errol Spence at World Boxing Organization (WBO) welterweight champion Terence Crawford na nangunguna sa listahan ng mga posibleng makalaban ng Pinoy champion.
Ayon kay Freddy Fresco ng Now Boxing, mas makabubuting magharap muna sina Spence at Crawford sa isang unification bout kung saan ang mananalo ang mabibigyan ng karapatang sagupain si Pacquiao.
“I don’t want undefeated welterweight champions Terence “Bud” Crawford and Errol Spence Jr. fighting Manny “Pac-Man” Pacquiao anytime soon. I want them to fight each other first with the winner fighting for undisputed status against the legendary Pac-Man,” ani Fresco.
Hindi birong makalaban ang tulad ni Pacquiao.
Mabagsik ang kasalukuyang estado nito na kita sa kanyang huling dalawang laban kontra kina Adrien Broner at Keith Thurman.
Wala ring tigil sa ensayo ang reigning World Boxing Association (WBA) welterweight king.
Noong nakaraang araw, naglabas ng bagong video si Pacquiao para ipakita ang bangis ng kanyang kamao.
Kaya naman hindi basta-basta kalaban ang Pinoy legend.
Mas makabubuti kina Spence at Crawford na magharap muna bago subukang pumasok sa mas matinding bakbakan laban kay Pacquiao.
Magiging malaking pabor ito sa kung sinuman kina Spence at Crawford ang mananalo dahil tiyak na isang blockbuster fight ang nakaabang sa oras na makasagupa si Pacquiao.
Tahimik pa ang kampo ni Pacquiao para sa kanyang susunod na laban.
- Latest