Mga pambato sa nasud sa Olympics pabiling madasigon
CEBU, Philippines — Nasagmuyo man tuod gumikan sa pagkasibog sa 2020 Tokyo Olympics, apan nagpabiling madasigon ang mga Pinoy'ng atleta nga kwalipikado na unta sa maong prestihiyosong torneyo nga mahitabo kausa lamang sud sa upat ka tuig.
Ang Olympics orihinal nga gikatakda karon untang Hulyo 24 ngadto sa Agosto 9 didto sa Japan, apan giuswag kini sunod tuig gumikan sa coronavirus pandemic.
Matud pa ni pole vault champion EJ Obiena nga iyang gamiton ang lugway nga panahon aron bairon pa og maayo ang iyang abilidad.
"I'm a bit lost to it but it’s definitely bigger than sports and I understand the decision," matud pa sa 24-anyos nga si Obiena nga atua karon sa Formia, Italy nag-training.
"I'm trying to see to it that the additional time given would be used wisely," dugang pa ni Obiena segun sa taho sa The Philippine STAR, igsuon nga mantalaan sa Banat News.
Susama sab ang sentimento nilang gymnast Carlos Yulo ug boxers Eumir Felix Marcial ug Irish Magno nga igo lamang makalaum nga mamaayo na ang tanan sa labing dali nga panahon.
"Sana po matapos na lahat ng ito para makapag-focus at makabalik na kami sa training," batbat pa ni Magno.
Ang mga opisyales sa Olympics daan nang mipahibalo nga kadtong mga ni-qualify na awtomatik nga makaapil sa 2020 Tokyo Olympics nga mahitabo sunod tuig na.
- Latest