Butler, Warren gipangsilotan sa NBA

CEBU, Philippines — Gipangsilotan sa NBA sila si Miami Heat forward Jimmy Butler ug Indiana Pacers guard T.J. Warren gumikan sa usa ka dili maayong insidente diin sila nalambigit.

Si Butler gipamulta og $35,000 (P1.75 million), samtang si Warren gipabayad og $25,000 (P1.25M) gumikan sa pagbinayloay nila og sakit nga mga pulong atol sa 122-108 nga kadaogan sa Heat batok sa Pacers niadtong Huwebes.

Human gipitohan ang duha og technical fouls gumikan sa mainit nilang komprontasyon, si Warren gitawgan og offensive foul batok ni Butler sa nahibilin nga 6:22 sa duwa. Ang maong bayolisyon ni Warren gi-isa sa liga ngadto sa usa ka Flagrant Foul One human ila kining gi-review.

Gumikan sa gibuhat ni Warren, gibalikas ni Butler si Warren nga iyang ginganlan og usa ka basura. Sunod niini, gi-foul ni Butler si Warren pinaagi sa pagbanga sa iyang abaga ngadto sa dughan ni Warren.

Si Warren mibawos pinaagi sa pagpakpak atubangan ni Butler hinungdan nga miulbo  ang ikaduhang hugna sa ilang panagbangi. Miresulta kini ngadto sa laing technical foul ug pagka-ejected ni Warren diin makita si Butler nga nag-goodbye kiss samtang si Warren gipagawas sa korte.

Bisan og humana ang duwa, si Butler wa'y puas nga mibirada ni Warren pinaagi sa dili maayong mga pulong hinungdan nga mas bug-at ang  silot nga gipahamtang kaniya.