Gilas nalangkatan sa ilang trono sa Asian Games basketball

CEBU, Philippines — Napakyas ang Gilas Pilipinas sa ilang misyon nga madepensaan ang ilang korona sa Asian Games basketball.

Ang mas sakit kay ang Gilas wala gani makaabot sa quarterfinals.Kini human ang Pilipinas gikukata sa karibal nilang China, 105-61, sa 2026 Aichi-Nagoya Asian Games kagahapong adlawa didto sa Aichi International Arena sa Japan.

Duna pa untay tsansa ang Gilas nga moabante sa sunod nga hugna sa torneyo kon ugaling napildi lamang sila og 37 puntos. Apan gitinuod sila sa China nga milubong kanila og 44 puntos hinungdan sa sayong pagkatagak sa mga Pinoy.

Mao kini ang unang higayon nga ang Gilas wala makasud sa quarterfinals  sa Asiad sukad sa ilang pagkahimugso.

Mangtas kaayo ang China nga mipabarag nang daan sa Gilas uban ang 36 puntos nga labaw human sa first half.

Padayong nanginit ang China ug wala mitugot nga makapaduol ang Gilas bisan pa sa sunod-sunod nga 3-point nga mga tira nilang Jerrick Ahanmisi, Calvin Oftana, Robert Bolick ug Justine Baltazar. Si Junjie Wang maoy nangu sa China uban ang 20 puntos,  14 ka rebounds ug tulo ka assists.    

Si Sanning Liao midugang og 14 puntos ug upat ka rebounds, samtang si Mingxuan Hu mitali og 13 puntos.

Mihimo sab og kasikas sila si Boqiao Jiao ug Li Yuezhao bitbit ang 11 puntos matag usa ingon man sila si Jinqiu Hu ug Yongxi Cui nga parehong mitimbre og 10 puntos. Si Oftana maoy bugtong player sa Gilas nga mikulit og double digits uban ang 13 puntos.

Sa pagkatibugsok sa Gilas nga kausa lamang midaog sa tulo ka duwa, ang Jordan ug Saudi Arabia maoy milayat sa quarterfinal round.  Pait kaayo ang kapakyasan nga nahiaguman sa Gilas.

Tulo ka tuig ang milabay, ang Pilipinas midaog sa una nilang basketball gold medal sa Asian Games sud sa 61 ka tuig.Balik sa Hangzhou niadtong 2023, ang Gilas, nga gipangulohan ni Justin Brownlee, mipalagpot sa China sa semifinals.

Karon, pait nga panimalos ang gisagpa kanila sa China.