Suns dapasa Clippers
LOS ANGELES -- Umiskor si Paul George ng 24 points habang may 20 markers si Kawhi Leonard para banderahan ang 120-99 panalo ng Clippers laban sa Phoenix Suns.
Hindi naglaro si Leonard sa kanilang kabiguan sa Chicago Bulls noong Martes.
Sa kanyang pagbabalik sa Staples Center ay nakipagtambal siya kay George sa ratsada ng Clippers sa third quarter para itala ang 21-point lead, 90-69.
Nagdagdag si Lou Williams ng 20 points at may 12 markers si Ivica Zubac para sa ika-12 sunod na pagdomina ng Los Angeles sa Phoenix.
Tumipa si Kelly Oubre Jr. ng 19 points at humakot si Deandre Ayton ng 18 points at 12 rebounds para sa Suns, nalasap ang ikaapat na dikit na kabiguan.
Sa New Orleans, humataw si Spencer Dinwiddie ng 31 points at tinalo ng Brooklyn Nets ang Pelicans, 108-101, sa overtime.
Ipinalasap ng Brooklyn ang franchise-long losing slump ng New Orleans sa 13 games.
Nagposte si Joe Harris ng 24 points, kasama ang right-wing jumper na nagbigay sa Nets ng 104-98 bentahe sa huling 1:28 minuto sa extra period.
Sa New York, nagpasabog si rookie RJ Barrett ng career-high 27 points para pamunuan ang Knicks sa 143-120 paggupo kay Trae Young at sa Atlanta Hawks.
Ito ang ikatlong panalo ng Knicks sa huli nilang apat na laro matapos mahulog sa 10-game losing skid.
- Latest
