Spurs nakapasol na sab og dakong isda
CEBU, Philippines – Human gibihag ang Los Angeles Clippers, nakapasol na sab og dakong isda ang San Antonio Spurs didto sa ilang korte sa dihang ilang gipahagba ang Houston Rockets, 135-133 sa kutas nga duwa nga milanat og duha ka overtime sa NBA kagahapon didto sa AT&T Center.
Mipatigbabaw ang Spurs bisan og nagmangtas ang duha ka alas sa Rockets nga sila si James Harden ug Russell Westbrook.
Si Harden mipabuto og 50 puntos, samtang si Westbrook mirehistro og triple-double apan wala sila'y nahimo paglihay sa Rockets nga makatilaw og laing pilde.
Si Lonnie Walker IV maoy milugwa nga labing hayag nga bitoon sa Spurs human mikadlit og 28 puntos uban ang upat ka rebounds.
Ang mainit nga salida ni Walker sa naghinapos nga bahin sa regulasyon maoy hinungdan nganong naka-overtime ang Spurs.
Nakapanimaho na unta og daog ang Rockets gumikan kay naglabaw og 10 puntos sa nahibiling kuwatro minutos, apan si Walker miposa og duha ka sagunson nga tres nga nakatabla sa iskor, 115-115 dayon na ngadto sa unang overtime.
Ang Spurs mikayod og maayo sud sa duha ka overtime hinungdan nga ila gyud nga napilde ang Rockets.
- Latest