Toledo naghari sa cluster 4 SA 2019 Governor Gwen Garcia Unity Volleyball Cup
CEBU, Philippines — Gipakyaw og daog sa Toledo City ang lima nila ka mga duwa aron pagdominar niini sa Cluster 4 sa 2019 Governor Gwen Garcia Unity Volleyball (GUV) Cup niadtong weekend didto sa Tuburan Sports Complex.
Ang Toledo, ang bugtong siyudad ning maong cluster, misikad sa ilang kampanya pinaagi sa paglampaso sa Tabuelan, 25-16, 25-13 ug dayon nakaipsot batok sa Asturias sa kulbahinam nga tulo ka sets, 22-25, 25-25-23, 25-22.
Gikadlit sa Toledo ang ikatulo nilang sagunson nga daog pinaagi sa pagtumba sa Balamban, 22-25, 25-14, 25-7
Nakasustinir sa ilang kainit ang Toledo aron pakgangon ang host Tuburan, 25-20, 19-25, 25-17 sa wala pa gituldokan ang ilang kampanya pinaagi sa 25-10, 25-15 nga demolisyon sa Aloguinsan.
Sa laing bahin, ang Tuburan napilde man tuod sa Toledo, apan nakaangkon gihapon og luna sa quarterfinals gumikan sa pagposte niini sa ikaduhang labing nindot nga rekord uban ang upat ka daog ug usa ka pilde.
Gibuntog sa Tuburan ang Asturias, 25-23, 23-25, 25-10 sa wala pa nila ilampaso ang Balamban, 25-14, 25-15 ug Aloguinsan, 25-18, 25-23.
Gipilde sab dayon sa Tuburan ang Tabuelan sa tagakay nilang duwa, 25-15, 21-25, 25-22 aron makig-uban sa Toledo ngadto sa sunod nga hugna sa torneyo.
- Latest
