SMB sa semis na
MANILA, Philippines — Iniluklok ng mga Beermen ang sarili sa dapat nilang kalagyan.
Nalampasan ng No. 7 San Miguel ang pagbangon ng No. 2 NorthPort mula sa 16-point deficit sa final canto para itakas ang 90-88 panalo at itiklop ang kanilang quarterfinals match papasok sa semifinal round ng 2019 PBA Commissioner’s Cup kahapon sa Smart Araneta Coliseum.
Nauna nang kinuha ng Beermen ang 98-84 panalo bago sibakin ang Batang Pier, nagdala ng ‘twice-to-beat’ advantage sa quarterfinals.
“We’ve got to focus in practice. Get locked in and be ready for the semifinals,” sabi ni import Chris McCullough, humakot ng 31 points, 11 rebounds, 4 blocks, 3 steals at 1 assist.
Lalabanan ng San Miguel ang mananaig sa best-of-three quarterfinals wars ng No. 3 Blackwater at No. 6 Rain or Shine para sa best-of-five semifinals series.
Matapos kunin ng NorthPort ang 33-25 abante mula sa basket ni Mo Tautuaa ay naglunsad ang San Miguel ng 12-0 atake para agawin ang 37-33 bentahe sa second quarter.
Itinuloy ng Beermen ang kanilang pananalasa sa pagtatayo ng 16-point lead, 79-63 mula sa three-point shot ni McCullough sa huling 8:45 minuto ng final canto.
Muli namang napasakamay ng Batang Pier ang 86-82 kalamangan mula sa tres ni Sean Anthony sa huling 1:51 minuto nito.
Ang triple at fastbreak layup ni Arwind Santos ang nagbigay sa San Miguel ng 87-86 abante sa natitirang 1:23 minuto ng laro kasunod ang drive ni rookie Robert Bolick para ibalik ang NorthPort sa itaas, 88-87 sa huling 31.6 segundo kung saan ‘di na sila nakabalik pa.
- Latest