E&F Surplus, Chichay's Chicharon napilde na gyud sa CLBA Season 2

CEBU, Philippines – Naputol ang nagkadinang lima ka daog sa E&F  Surplus human madisgrasya sa Philcement, 83-74 sa CLBA Season 2 basketball tournament nga gipaluyohan sa Union Galvasteel ug J&J Surplus niadtong Martes didto sa GT Academy gym sa Tayud, Lilo-an.

Si Luis Pepito mikandos og 16 puntos aron mangu sa upat ka Philcement players nga miiskor og double figures. Ang laing tulo mao si Torion Tiongson nga mihabwa og 14 puntos, gisundan ni Manolito Dejarme sa iyang 13 puntos ug Jason Retiza nga adunay 11 puntos.

Ang 3-2 nga Philcement ni Bobong Tiongson mao ang naggukod gikan sa pagsugod ug sa fourth quarter na sila nakaapas dihang nagguba ang duwa sa E&F Surplus.

Sila lang si Iway ug Edu    Pepito  ang  miariya og    double  figures  sa E&F Surplus nga nagkumbinar og 30 puntos. Dili kaayo maayo ang produksiyon sa team owner ug leading scorer   Fury Trazona nga igo lang miiskor otso puntos sa iyang koponan nga mikadaog sa ikaduhang dapit  sa ilang 5-1 record.

Nag-una karon sa standing ang Kalubi-an nga mao sab ang nakabuling sa rekord sa Chichay's Chicharon  ni Wendy Quiapo pinaagi sa pagpilde, 83-71.

Ang Kalubi-an  nagbitbit  na  karon  og 5-0 nga baraha, samtang ang Chichay's Chicharon ni Jun Rayan Pepito nagtangag og 3-1  win-loss record.

Mipupo og 20 puntos si Mark Loon aron  mangu sa Kalubi-an ug si Almer Icot miani og 18 puntos.

Si Bebe Armian mao sab ang topscorer sa Chichay's Chicharon nga mikadlit og 17 puntos, gisundan nilang Arnel 'Cdu' Pepito ug Achilles Noynay nga mitimbre'g 12 puntos matag usa.

Sa laing aksiyon, nakatilaw na gyud og daog ang Nazarene human makaipsot sa Forwarders, 72-68.

Si Recilen Manatad maoy kuyaw nga nakaduwa ug gipangulohan ang Nazarene pinaagi sa iyang 32 puntos. Sila si Nick Encluna ug Wilmar Misoles nag-amotay og 15 puntos sa Nazarene  ni Jed Balaod nga miposte og  36-16 sa halftime.

Tulo sab ka players  ang miiskor og double figures sa Forwarders ni Genesis Pepito nga wala pa'y daog sa lima ka duwa ning maong liga nga gipasiugdahan ni ballclub president Arnold Labustro ug vice president Henry Agbon.

Ang mga duwa gipadagan ni league commissioner Fury Trazona sa abag nilang Chang Tejero, Harris Perez ug Eric Montebon.

PUNTOS MATAG USA

Unang duwa:

PHILCEMENT (83) – L. Pepito 16, T. Tiongson 14, Dejarme 13, Retiza 11, Lozano 6, Baring 5, B. Tiongson 4, Gaite 2, 

Manaquil 2, Mantos 2.

E&F SURPLUS (74) – Iway 18, E. Pepito 12, Trazona 8, Betinol 8, Nuñez 8, Ponce 6, Ursal 5, Igoy 4, Sabang 1.

Ikaduhang duwa:

KALUBI-AN (83) – Loon 20, Icot 18, Isok 8, Tilitili 8, Cortes 6, Pepito 6, Pepito 5, Pepito 3, Barriga 2, Mangapis 2.

CHICHAY'S (71) – Armian 17, A. Pepito 12, Noynay 12, Caparoso 10, Rojo 9, Sayta 4, Arocha 3, Nogas 3.

Ikatulong duwa:

NAZARENE (72) – Manatad 32, Encluna 15, Misoles 15, Divino 6, Cabatingan 4.

FORWARDERS (68) – Auman 16, Pepito 11, Tamparong 10, Buenaventura 8, Lee Jr. 6, Arances 5, Orongan 4.